In ’nen tied woe-in de Germaonse taole nog neet gesjreve woorten en boe de Roemeinse euverheid Latien es gesjreve spraok gebruukde, verwoondert ’t ouch neet tot geine literatuur besteit. Zoewiezoe kós in deen tied geine Limbörgstaolege literatuur bestoon. ’t Wes-Germaons wat in deen tied gesproke woort, had nog neet die kinmerke aongenome, woe-door me de modern spraoke al drin herkinne kós. Toch gaof ’t hei en dao get werke in de Germaonse veurluipers vaan de modern taole.

D’n ajds-bekinden teks vaan Germaonsen oersprunk is ’n gedeiltelek Oos-Germaonse biebelvertaoling vaan de Gothische bisjop Wulfila (311-383). Heer gebruukde ’n alfabèt wat ’r oet z’n eige samegestèld had mèt Greekse en Latiense lètters en Germaonse runeteikes. Dees biebeleuverzètting waor netuurlek mer zier indirek ’ne veurawwer van de Limbörgse taol.

Ei literair werk in de Germaonse volksspraok oet de zevende iew nao 0 is bekind en weurt touwgesjreve aon ’n vrouw oet de in Limbörg gelege zuieleke Maosgouw. ’t Book is ’t Vizioenebook vaan de Heilege Aldegunda of Aldegunde. Zie zouw vaan roond 630-684 geleef höbbe. Tot in de 9de iew zouw dit e geleef lees- en lierbook blieve. Dit literair-relizjieus produk waor daomèt ’ne veurluiper vaan väöl literatuur dee in Limbörg get later in de Middeliewe zouw veurkoume.

Bronnelies
Janssens, U., De Oude Belgen; Geschiedenis, leefgewoontes, mythe en werkelijkheid van de Keltische stammen, The House of Books, 2007.
Jappe Alberts, W. , Geschiedenis van de beide Limburgen, Van Gorcum, Assen, 1972.
Robinson, O. W., Old English and its closest relatives; A survey of the earliest Germanic languages, Stanford University Press, 1992.
Roymans, N., Ethnic Identity and Imperial Power. The Batavians in Early Roman Empire, in: Amsterdam Archaeological Studies, 10, Ch. 4, Amsterdam, 2004.
Vries, de, J. W., Willemyns, R., Bruger, P., Het verhaal van een taal; negen eeuwen Nederlands, Prometheus Amsterdam, 1993, 15.
Wal, van der, M., Geschiedenis van het Nederlands, Utrecht, 1992.
Willemyns, R., Het verhaal van het Vlaams; De geschiedenis van het Nederlands in de Zuidelijke Nederlanden, Standaard Uitgeverij Antwerpen, 2003, 37-39.

http://www.dbnl.org/tekst/vooy001gesc01_01/vooy001gesc01_01_0003.htm, 20 (17-01-2008).