Limbörg kraog häöre naom wie ’t ein vaan de provincies vaan ’t Vereineg Keuninkriek vaan de Nederlande woort. Daoveur bestoont Limbörg ouch al, meh oonder versjèllende naome en staotkundege umstandeghede. Es provincie vaan ’t Vereineg Keuninkriek bestoont Limbörg veur d’n doer vaan dat keuninkriek vaan 1815 tot 1839. Wie de Belzje en de Limbörgers tege de absolutistische heersjappij vaan d’n Hollandse Keuning Wöllem d’n Ierste in verzèt kaome, woort Oos-Limbörg, mèt Mestreech es hoofstad oonder Hollandse euverheersjappij gezat. ’t Westelek deil vaan Limbörg kaom oonder Belzje euverheersjappij mèt de nui hoofstad Hesselt.

Oos-Limbörg is sins 1839 de meis zuieleke provincie in Nederland en heet ’n zier distinctief karakter. Zie bevint z’ch in ’t zuid-oostelek deil vaan Nederland, veurnaomelek oostelek vaan de revier Maos. De hoofstad Mestreech weurt gesjeie door de Maos. Oos-Limbörg grens aon Wes-Limbörg in ’t weste, Frans-kallend Belsj en de Limbörgs-kallende Voerstreek in ’t zuie, Duitsland in ’t ooste en aander Nederlandse provincies in ’t noorde. De sociaol-economische trends, die de provincie in de aofgeloupe decennia beïnvlood höbbe, bróchte e perces vaan verandering en vernuiing op gank, woedoor de naodeile vaan de randlocatie in de nationaol staot in de natuurleke veurdeile vaan häör Europese locatie umgezat zien gewore.

Wes-Limbörg is de meis oosteleke provincie vaan Vlaondere, wat ein vaan de drei administratief regio’s op ’t Belsj is. Wes-Limbörg bevint z’ch westelek vaan de revier Maos. In ‘t ooste grens de provincie aon Oos-Limbörg, mèt Nederland in ’t noorde en de Belsj provincies vaan Luik in ‘t zuie en Vlaoms-Braoband en Antwerpe in ‘t weste. De hoofstad Hesselt is in ‘t westelek deil vaan de provincie. De mie oostelek gelege stad Gènk is ein vaan de economische centra. ‘t Veurnaomste oonderwiescentrum, de Universiteit vaan Hesselt in Diepenbeek heet e samewèrkingsverband mèt de belankriekste universiteit vaan Oos-Limbörg in Mestreech aongegange, boemèt de transnational University Limburg (tUL) gestiech is gewore.

Boete de ben vaan spraok, historie en cultuur gief ‘t väöl gemeinsjappelekhede die de Limbörge biejeinbint. Oetsletend tösse de twie Limbörge weurt ‘ne charter veurbereid genaomp “Oos Wes, Limbörg Bès“. Dee charter moot de gemeinsjappeleke Limbörgse weerdes en kwalliteite oetdrökke en e raomwerk beje veur gezaomeleke projekte, die veur alletwie de deile vaan Limbörg vaan hoeg importantie zien.
Oos- en Wes-Limbörg oonderzeuke de meugelekhede veur same te goon door verdeping vaan de samewèrking op väöl belumpsterreine. In 2008 höbbe de gouverneurs vaan de twie provincies hun intentie geannonceerd veur nao de creatie vaan ‘n groet-Limbörgse regio touw te wèrke, veur zoe de historische verdaoling vaan de nationaol en polletieke sjeiing vaan de regio good te make.

De Euregio Maos-Rien is ’n organisatie boe-in de twie Limbörge samewèrke mèt de Belsj provincie Luik, de kreits Aoke op ’t Prusisch en de veurmaoleg Duitse kantons op ’t Belsj. Same mèt dees partners is ouch ‘n samewèrking opgezat gewore veur de Technological Top Region Europe (TTR Euregion) te sjaffe. Op gelieke leis en veur de grenseuvertrèkkende criminaoliteit tege te goon, participere de twie Limbörge mèt hun Euregiopartners in ’t Justitiebureau Internationale Samenwerking (JIS).

Mèt de touwnummende Europese integratie zeuk Limbörg nao ’n verdeping vaan de inter-Limbörgse samewèrking, zoe wie de verbindinge te herlègke mèt zien historische partners in de Maos-Rien regio.