Eur hölp höbbe veer nudeg veur ’t Limbörgs!
Höb G’r e vrij eurken of twie in de week of mesjiens get mie? Leus G’r gere beuk of sörf G’r gere op ’t internèt? Daot G’r gere get veur ’t Limbörgs? Veer höbbe daan gere Eur hölp.

Gein inkel stiechting kint functionere zoonder d’n inzat vaan vrijwèllegers. En zeker bij us, boe hoonderde Limbörgstaolege werke en websites naogegange mote weure veur wäörd, citaote en oetdrökkingen, is Eur hölp zier gewins.

Wat weurt vaan Uuch gevraog? Get lezen en get invöllen op eus open source lies vaan Limbörgse wäörd. Es G’r hei duit, daan vint G’r get oetveureger wie dat in zie werk geit. Wie intensief G’r demèt aon de geng wèlt zien, laote veer aon Uuch euver, meh veer hope netuurlek tot Geer zjus wie veer zoeväöl plezeer draon zölt höbbe, tot G’r neet demèt op wèlt hawwe.

En oonderwijl tot G’r plezeer höb, mesjiens tot G’r debij ouch väöl sjoene Limbörgstaole literatuur liert apprèciëre. Kint G’r de werke vaan de moderner sjrievers Léon Veugen, Frits Criens, Wim Kuipers, Jeanne Alsters – van der Hor? Of mesjiens hèlt G’r vaan awwer werke vaan Felix Rutten, Fons Olterdissen of Frans Schleiden? De spannetege jäögromans vaan Sjo Notten mesjiens? Kemediestökker zien mie Eure smaak? Wat vint G’r vaan de theatermonologe vaan Zjèr Bataille/Ger Bertholet? ’t Gief mie es käös genóg. Loert meh ins op eus open source biejeinzeumeringe vaan mie es 500 literair titels en mie es 250 kemediestökke, musicals en kemikke opera’s.

En es Uuch dat neet aonsprik, daan loert ins op eus open source biejeinzeumering vaan Limbörgstaolege internètbronne. Vaan Wikipedia tot informatie euver Limbörg en häör historie, spraok, allewijlege locaol eveneminte, de vastelaovend en väöl aander oonderwerpe vinde hun oetdrökking op ze Limbörgs op ’t internèt. Dao zit alliech ouch get veur Uuch tösse.

Dus veer zouwe zègke: Gaot same mèt us aon de geng! V’r höbbe Uuch gere debij. Duit hei veur Uuch noe bij us op te geve!