De Stiechting Limbörgse Academie is op ’t begin vaan 2007 opgeriech gewore. Häör buut is mèt modern middele de Limbörgse taol touwgankelek te make veur e groet publiek en spraokweitesjappers, veur zoe ’n contributie aon ’t behaajd vaan de spraok te lievere. Dr. Yuri Michielsen-Tallman, LL.M (Harvard) en Stuart LaRosa, MA (UC Santa Cruz) zien de opriechters vaan de Stiechting Limbörgse Academie, die häöre zetel in Nederland heet.

Sommege samewèrkingsverben, die noe in de stiechting oondergebróch zien gewore, veure trök tot 2004 en sommeg werk geit trök tot veur deen tied. D’n aonzat veur de stiechting woort evels in 2006 gegeve wie Yuri Michielsen en Stuart LaRosa financering zeukde veur ’t dictionairprojek, boe-aon zie al langer samewèrkde, en daodoor ouch de samewèrking wouwe formaolisere.

Al gaw woort ouch dudelek tot mie hölp nudeg waor bij ’t oetveure vaan dit projek. Veur specifieke vraoge woort kontak gezeuk mèt spraokkundege, die euver Limbörgs of bizunder taolkundege aspekte, die ouch op ze Limbörgs veurkoume, mie kinnes hadde. Ouch woort veur ’t doornumme vaan de gedrökde Limbörgstaolege werke nao vrijwèllegers gezeuk, die z’ch heiveur wouwen inzètte.

Dees expèrs en vrijwèllegers zien gei lid vaan de stiechting zelf, umtot dit wèttelek neet meugelek is, meh helpe wel mèt in de oetveuring vaan de stiechting d’r wèrkzaomhede. De expèrs zien hei-veur georganiseerd in ’n kemissie, geneump Academischen Adviesraod. Door zitting te numme in deen Academischen Adviesraod, tuine zie hun goodkäöring veur dit projek aon en hun bereidheid aoventouw mèt taolkundege vraoge gekontakteerd te weure. De vrijwèllegers zien deil vaan eus bestand vaan vrijwèllegers en zörge mèt hun werk deveur tot de Limbörgstaolege werke geleze weure en daomèt tot e belankriek deil van ’t dictionairprojek weurt oetgeveurd.